هو امتي الركيزة تبقي HINGED وامتي تبقي FIXED للمباني في المودل ؟
..
خلينا نقول إن إحنا عندنا 3 أنواع رئيسية من الركائز
1- FIXED
2- HINGED
3- ROLLER
.
نبدأ ب أخر نوع وهو الـ ROLLER وده إحنا عارفين إنه عبارة عن إرتكاز حر في المستوي الافقي لو بنتكلم في عمود أو دعامة ، ومقيد فقط أو غير مسموح بالحركة في إتجاه Z وده بنشوفه في إرتكاز بلاطات الكباري علي الدعامات ، وممكن نتخيله في ال BASE ISOLATION SYSTEM في المباني ، لما يتم عزلها زلزاليا عن الأساسات بيبقي مسموح بالحركة في X و Y ، عشان كدة النوع ده مفيش منه حيرة أو مش شايع بشكل مستمر. 
.
نيجي بقة للخلاف بين ال HINGED وال FIXED 
خلينا نضع نقط عامة قدامنا كدة وهي طريقة نقل الحمل ؟ ايه هو الحمل اللي عاوز تنقله للعمود/للأساسات وتصمم عليه ! يعني ايه الكلام ده ؟
.
* في حالة ال HINGED
- الأحمال المنقولة للأساس :
قوة رأسية فقط تصمم بيها القاعدة بتاعتك وبالتالي قطاع الأساس سيكون مقبول ومنطقي والاجهادات موزعة بشكل منتظم (غالبا) ، وبتكون فرصة وجوده ك اساس منفصل عالية ! نسبة عالية وليست 100% !
- الأحمال المنقولة للعمود:
قوة رأسية وعزوم في الاتجاهين لكن علي جانب واحد من العمود ! وبالتالي بندخل في INTERACTION DIAGRAMS ونبدأ نشوف عمق القطاع وعرضه مناسب ولا لأ ! وهنا بندخل في إن فطاع العمود بيكون عُرضة للزيادة.
.
* في حالة ال FIXED ..
- الأحمال المنقولة للأساس:
قوة رأسية وعزوم في الاتجاهين وبالتالي توزيع الاجهادات بيكون غير منتظم وفي الحالة دي القاعدة بتؤول إنها تزيد عن الحالة الاولي ! تزيد كأبعاد وبالتالي تزيد ك تسليح ! وفرصة تداخلها مع قاعدة تانية وتبقي مشتركة أكبر !
- الأحمال المنقولة للعمود:
قوة محورية وعزوم في الاتجاهين لكن العزم بيتقسم علي جانبين العمود وبالتالي القطاع يقل عن الحالة الاولي !
.
إذن دي فرضية نقل الحمل اللي بيحددها المهندس بشكل عام لكل عنصر وكل حالة في المنشأ!
لكن في حالات بتجبرنا أحيانا علي إختيار نوع معين من الركيزة ! زي ايه مثلا ؟
.
1- في حالة الزلازل .. يفضل جداً إن المبني يكون FIXED وده طبقا لنص كود ال ASCE7 بند 12.7.1
بكدة هنسمح للاساسات ‘نها تشيل العزوم مع الاعمدة.
.
2- في حالة غذا كانت التربة ضعيفة - هتلاقيك تلقائيا بتعملها HINGED ..... ليه ؟
لانه لو اتعملت FIXED ف ده معناه نقل عزوم للأساسات وبالتالي الاجهادات العامة علي التربة عالية وبكل تأكيد هتعدي الاجهاد المسموح للتربة وبالتالي يا إما تنتقل لنوع اساسات جديد سواء لبشة أو PILES أو الحل الآخر وهو الحل علي أساس ال HINGED وفي الحالة دي هتنقل العزوم للاعمدة ، قطاعها هيزيد ؟ آه هيزيد بس في الأعمدة عندنا الاختيارات الكتير للتغلب علي ده عكس الاساسات.
.
3- STABILITY OF STRUCTURE CASE
حالة الاستقرار للعنصر او المنشأ ، يعني دايما لو عنصر كابولي زي ال FREE RETAINING WALL ومش متصل بأي بلاطة من الاعلي ، ده لازم يبقي FIXED عشان يبقي STABLE أصلا !
.
حالة حية تعرضت لها شخصيا في 2017 عند تصميم احد الحوايط الساندة !
فى أحد المشاريع كنت بحل حائط ساند ل مول فيه بدرومين ، بصمم شريحة الحيطة على أنها FIXED من تحت وHINGED عند إتصال الحائط مع البلاطات البدرومين ، لقيت أن العزوم كانت عالية واساس الحيطة طلع UNSAFE ومفيش سماحية للزيادة ، قمت قالب الركيزة هنجد ، طلعت الاساسات SAFE والحيطة قطاعها و تسليحها زاد شوية نتيجة فرق العزوم فى الرسمتين اللي في التعليقات !
.
الموضوع في النهاية يؤول ناحية ال STABILITY OF STRUCTURE لأنه في النهاية المنشأ هيتصرف طبقا للطريقة اللي انت ك مهندس إنشائي مصمم بيها ! لكن مش دايما بيكون لينا الخيار لتحديد النوع ده.
0 التعليقات:
إرسال تعليق